PRESS RELEASE

No.123/2020

SIAHA, 21 Thlazoh, 2020 - Atanoh dawh 9:00 Am pa ta Saikao biatuhpa MDC Puhpa B. Luaha cha Mara Autonomous District Council liata Vice Chairman, Planning (Plg) and Development Board châna piepa a châ vâta Kaochao East khihtlâh nôpawpazy ta alykheina ama hnei.

Alykheina he Bazar Shed liata Programme chyupa taopa châ ta, Puhpa MB. Ratlua, Ex-VCP & Member, VC-I, Kaochao East  ta chhihtha ta, Tisi biatuhpa MDC Puhpa Tiahlei Syhlô, Chairman, Town Committee, Tôkalô biatuhpa MDC Puhpa M. Laikaw, President, BJP, Siaha District nata Puhpa B. Luaha, Vice Chairman, Planning(Plg), MADC zy ta biereina chyupa ama hnei chyu.

Daihti pathao nawpa ta Machâ Beihai Hlychho, Awnano Hyutuhpa, ECM ta Programme Khazohpa lâ pavaosana hnei ta, Puhpa Pawkhu T. Azyu, General Secretary, BJP,  Siaha District ta hmiapahnosana a hnei.

Biatuhpa Puhpa B. Luaha biereina chyupa a hneipa liata a bierei tlâhpi viapazy:-

1. Ahmiatua ta daihti pha kawpa miah pietuhpa eima Khazohpa nata Khitlâh VC nôpawpazy hnoh ta alynabie reih na ta, he liata avypakhypa zawpi zy zana nata anaohna Samaw ei cha hlâ ei.

2. Odyh pawzy nata he liata avypakhypazy ta ama rai hluhpi siesaipa ta nata ama daihti aparuapa ta he su liata miah namâ tyu dualâh vâta nama zydua hnoh ta alynabie reih na ta, Siaha lâ tawhta nâ zâzi tuhpa Official zy nata Party nôpawpa zydua hnoh ta alynabie ei reih hra.

3. Kô 2007 nata 2012 MADC General Election liata hlaotlohna vaw to leipa na ta, kô 10 khô lâ - kô 2017 liata atlyna liata ei bia zawpizy deichhyna nata khokheina thata to na ta, atloh thai beih lei awpa chyhsa, keima hawhpa tlai ta atlypatlohpa ei vaw châpa ei bia zawpizy deichhyna vâta a châ tahpa pahno na ta, khitlâh zawpi zydua hnoh ta alynabie ei reih hmeiseih.

4. Kô 2017 liata atlypatlohpa ei châ tarawpa ta Term khophie tlai Opposition liata vaw y hra ei si la, Khazohpa ryhraona hawhta eima CEM nata a hrialâhpazy khokheina nata eima BJP District President zy khokheina zawhzi ta atahmâ he Office zy pahrâ theipa ta room no-eih tlai ta ei vaw to hrapa he bia châta byhnâ a châ tah lei thei vana; nâ khokhei tuhpa Khazohpa nata eima nôpawpazy hnoh ta alynabie ei reih hmeiseih.

5. Ei bia zawpizy, Siaha liata MADC Office lâ namâ vy ti ta ei room lâ zy vaw charei lymâ u la, MADC office lia hleikhô ta office hropa BDO, DC etc. liata apeimawhpazy liata chhao abyuhna hawh ta ei cha zi lymâ aw ei; he liata ei tyu theipa he nâmo zawhzi a châ vâta athlachhie leipa ta apeimawhna hawhta eina tuah lymâ awpa ei chi a châ.

6. He hawhta châna patosapa ei châ hleikhô ta Motor zy pavaosapa châ na ta, apeimawhna hawh ta ei bia zawpi ta he Motor he eimâ hly awpa a châ; apeimawhna lia maih na chho lymâ awpa ta ei châ haw ei.

7. MDC ei châna hawh ta Contract raizy he hria achhuah leipa na ta, ei bia liata rai hria awpa a y khiah nâmo ei bia zawpizy hria awpa a châ aw.

8. He liata ei tyu chhôh zydua cha khih nata râh châta ei theina hawh ta hria lymâ ei chhuah; khitlâh zawpizy chhao ta na deichhy lymâ awpa ta ei châ haw hmeiseih ei.

9. BJP, Congress, MNF party tah leipa ta Mararâh châta, eima zydua ta hrialâh lymâ awpa ta chahrua ei na ta, ei châ haw ei.

10. Adyhryhna, akhokhei veichâhna, saiheina, kyhpachâna nata hriaparaohna phapa hnei lymâna chô ta he ti nata râh châta keih chakâ lâh lymâ awpa ta ei bia zawpi zydua chahrua ei na ta, ei châhaw hra ei. 

11. Atanoh liata he hawhta Kaochao East khitlâh nôpawpazy ta alyna Programme dei châ leipa ta sa thisaih palopa ta alyna eina taopa vâ ei chi ta palôh hmeiseihpa ta alynabie ei reih.

Daihti chhâna lâ liata Machâ L. Beihrua, Awnano Hyutuhpa, CCI(M) ta alynabie reina thlahchhâna a hnei.

Puhpa B. Luaha he BJP Party tawhta District President Puhpa M. Laikaw hleikhô ta BJP, Siaha District Headquarters liata nôpawpa thokhazy ta za zi ei ta, official lâ tawhta Puhpa Beirôkhu Beitâ, I & PO, MADC ta a chakao chahlâ. Laihsa Chhingpuii Azyu ta ei 2 lâ ta hlasapa ta Programme a palôpahawh hra.

Zâlâ liata Pihnô C. Vahla, w/o HC. Manliana (L) ta alykheina châta zâ pati â chhuanohpa vâta Puhpa B. Luaha ta Pihnô C. Vahla nata a chhôhkhazy hnoh ta palôh hmeiseihpa ta alynabie a reih.

ISSUED BY:-

Information & Public Relations Department

Mara Autonomous District Council

Siaha.