SIAHA, 26 Phiata, 2022, Pakhynoh  – Atanoh dawh 12:00 Noon pa ta Joint Village Council Western Belt, Siaha District chhihthatuhpazy ta Puhpa H. Malvina, CEM, MADC âlykheina ryuchâ (citation) a office chhôpadâh (chamber) liata ama vaw hlâ.

Âlykheina ryuchâ liata he hawhta ama roh.

Puhpa H. Malvina, CEM, MADC, Phura Constituency 2nd tawhta a tlyh patlohpa na châ pa he, arôhna tah pita eima ly ngâsâ.

Chadei chhao châleipata, Marâpa râh chhihthana liata luhchaipa CEM, MADC châna na patupa he keimo Joint Village Council Western Belt Committee ta eimâ cha ly khei hmeiseih.

Na sie lymâ nawpa liata khokheina chhao eima châ hlâ, tahpa ta ama roh.

Puhpa HC. Beichatlai, VCP, New Laty  ta âlykheina programme chhihtha ta, Puhpa K. Ngiachhô,  VC member, New Laty ta Abeipa la pavaosana thlahchhâna ta daihti a pathao. Puhpa CL. Pawsie, Joint Chairman, Joint Village Council Western Belt, Siaha District ta JVCWB vyuhpa ta Puhpa H. Malvina, CEM, MADC hnohta âlykheina ryuchâ (citation) he â hlâ. Puhpa T. Beiryrao, VCP, Phura North chhao he âlykheina ryuchâ piena lia heta a vaw hlao hra.

Joint Village Council Western Belt Committee he Mararâh notlâ (notlâ kaolâ) khih 25 rachhôh ta paduapa a châ. Puhpa Zese Solo, Joint Secretary, New Laty  ta thlahchhâna ta daihti a pachhâsa.