PRESS RELEASE 

NO 53/2023

 

SIAHA, 7 Pamih, Hriaheinoh - Atanoh zâlâ dawh 1:50 Pm khata Puhpa Beirahmô Syhly, EM i/c RD etc. ta Siaha District Football Association (SDFA) Ambulance thiehpa palâhâhna a hnei. 

 

EM (RD) Official Chamber liata programme chyuta hmâpa châ ta, Puhpa VT. Martin Vabeiduakhei, President, SDFA ta daihti chhihthapa ta Puhpa MH. Tiabi, EM i/c Education (MS) etc. ta bietana chyupa reina hnei ta, SDFA chhithatuhpazy ta Ambulance thiehpa palâhâh programme liata daihti pha kawpa ama piepa vâta alynabie reih ta, SDFA hnohta Ambulance pha kawpa pie tuhpa Puhpa Dr. K. Beichhua, MLA hnoh chhaota alynabie a reih hra. 

 

“Ato zydua he Khazohpa ngiachhiena châ ta, Mararâh châta pathipalôh zy hmâpa ta Khazohpa khih nata a siana tlua tua si la, ato zydua baichhapa ta eima y aw. Khazohpa ngâchhâna chôta hmialâ sie lymâ si la, sapa nata thlahpa he pachhaih thaipa a châ leipa vâta khâ a sie pakaoh awpa a châ.”

 

Chyhsa zy he asiapatluapa nata tloh pakipa y leipa pi ta, chavâta râh chakaona rai hria awpa heta tiama papua awpa nata hriaparaohna pha kawpa chhaota hmialâ sie lymâ awpa SDFA chhithatuhpazy hnohta pasyuna bie pha kawpa a reih. 

 

Puhpa Beirahmô Syhly, EM i/c RD etc. chhaota bietana reih ta, “SDFA he   thyutliapazy ta Football liata hmah ama sie nawpa nata palaiseisha awpa ta hmahlatuhpa py peimawh kawpa châ ta, Thyutliapazy chhihtha awpa ta PY a duapa eima châ hleikhôta hmopha leipa lâta ama sie lei nawpata ama hro chhitha awpa eima châ.“

 

“Chhithatuhpazy hriapasana nata rei araohna zawhzi ta eima hnei beihleipa Ambulance pha kawpa eima kaw hnei theipa he aly ngaita kaw na ta, mia pie tuhpa Puhpa Dr. K. Beichhua, MLA hnoh chhaota alynabie ei reih hmeiseih.”

 

“SDFA liata thapi phiata ahriatuhpa zydua hmialâ nama sie lymâ nawpa liata khokheina sâhchaipa eicha hlâ ei” tahpa ta bietana a reih. 

 

O chhôh liata programme hmâ khai tawhta MADC Complex tlyhmia liata Puhpa Beirahmô Syhly, EM chata Ambulance cha SDFA nata Mararâh thyutlia nahzy ta phahnai kawpata ama hmâ awpata ribbon chakiepa ta aly kawpa ta a palâhâh.

 

Siaha District Football Association zy heta Puhpa MH. Tiabi, EM nata Puhpa Beirahmô Syhly, EM zy hnohta hmosaipiepa Momento nata T. Shirt pha kawpazy ama hlâ.

 

ISSUED BY -

Information & Publicity Department

Mara Autonomous District Council, Siaha.