PRESS RELEASE 

NO.73/2026

Siaha, târi 3 Thlarâh, 2026 (Pobienoh) - Atanoh dawh 11: 00 AM khata Pre - Service Trainees Union (PSTU), DIET Siaha ta apachhuahpanohpa Graduation Day Programme cha Puhpa M. Laikaw, Hon'ble Chief Executive Member, MADC ta District Institute of Education and Training (DIET), Siaha Tlâhpi liata Khichhai Laipa (Chief Guest) chapa ta a hmâkhei.

He Programme he Chairperson Pihnô Vanlalchami Hnialum, Lecturer , DIET Siaha ta chhihtha ta, Puhpa Sahlo Bohia, Principal, DIET, Siaha ta welcome speech reina nata report piepa ta, DIET Siaha liata atahmâno he Principal nata Lecturer 7 ypa ta, Final Result pha kawpa ama hnei tyhpa reipa ta, atakô Final result apuapa lia chhaota Students 49 exam pa tawhta 47 ta hlaotlohna ama toh hra, a tah. DIET, Siaha tawhta âchu papuapa hry tawhta MADC lia dei châ leipa ta su hropa liata chhao rai hmopa ama y lymâ hra a tah. Maria A. Beinosia, 3rd Semester ta Abeipa hnohta daihti pavaosana hnei ta, Abeipa reithaina hlasana DIET Choir ta ama hnei hra.

Khichhai Laipa ta Programme âhlaopazy hnohta alynabie reina hneipa ta biereina hnei pazi ta, "eikhanoh kha PSTU chhihthatuhpazy ta na vaw charei ei ta, ama Graduation Day liata Chief Guest awpa ta vaw hrua ei ta, ei ly ngaita. DIET, Siaha he âhlapa tawhta tah leipa ta asu cheingei liata atanoh he ei kha ei hmôna nata tlyna châta, keima chhao thailei ei pachâ kaw.

Atanoh he Principal nata ahrialâhpa Lecturers zy râh châta nama hriapasana liata alynabie cha reih ei na ta, Mini DIET tawhta DIET pitlohpa kaw cha ta, cha nota Asu he Siaha Khichhôh nahta âhla kawpa vâna heta sievawna kyh liata Students zy chhaota rairuna thata nâma tyh tahpa he ei vaw thei tyh. He nama rairuna pathlâna awpa kyh liata hmahlana chhao hneingâ kaw pita, hlaotlohna chhao eima hmô nah ta ei hnabeisei.

DIET yna su he Khichhôh tawhta a hla hra sala, kaokhalâ pachâpa ta khihpi pyury ta apabua phaleina su a châpa vâta palôh pasoh kawpa ta Students zy chhaota achuna phapa hnei eih ta, cha chata âmo liata quality phapa a papua cheingei aw.

Teachers' Day ahmâna noh liata D.El.Ed Graduation Day Programme pachhypa a châpa he âhmie ngaita. Pachutuhpa he Nation -builders ama tahpa he âdo hmeiseih. Atanoh liata Râh nopawpazy he ama pachutuhpazy ta ama pachuna vâ deita ta Râh chakao theipa ama châ. Keima chhao viasazy nata nopaw khokheina zawhsi liata he duasu liata ei y theina chhâpa he nâ pachutuhpazy vâ a châ, âmo kha vaw y leipa ei sala BA, MA patlô thai aw va na. 

Tôkalô liata Private School padua pita, kô kha ei hria tawhta Old Siaha High School liata Pachutuhpa rai kaw hria heih na ta; class lapa ta ei riethei kaw tyh hra sala amylâ liata ei pachu awpa kha ei moh chhielie lymâ tyh. Nâmo, atanoh liata he su tawhta apatlô hapazy nata âchu ngâpazy nama pahno ngâthlâh ha awpa ta ei kho kawpa cha, nama patlô tita a kheihawhpa rai rai nama hria hapa chhaota, nama rai liata tiamana nata ngâchhihna khâchâ nama hnei awpa a châ. Pachutuh a châ awpazy ta nama pahno ngâthlâh ha awpa cha, 'Pachutuhpa ta Class chhôh tawhta Râh hmia apanano thei' tahpa hih. Khihsa nano nanopa saw, hawhti duasu nata chhichâna âlyu leipazy, ama nôpaw ta nama ku liata pahniehpa ta vaw soh ei ta, chazy cha mohôhpa ta thaina nama pachu ta, ama moral, character taopathina nâmo liata â pahnie awpa a vaw châ aw. Nama maophaohna âsâ ngaita aw, cha daihti liata cha daopathla ta ahaihi thai awpa nama châleizie khâ namâ thei ngâthlâh ha awpa ta atanoh he ei châ haw ei.

Achuna pachâ peimawh vâta nata eima râh thyutliapzy duasu pachâ pata soh y hravei sala Pachutuh lana hneipa châta, he nota Certificate doleipa hluhpi hmôpapua a châ. Zâhniatlia liana taih chhao khata Chyhsa pakha appointment pie hapa cha a certificate adovei tahpa hmôpapuapa châta, nâ vaw saohiah ei ta, cha chyhsa cha vaw disqualified ula, vaw terminated myh vy ei tah ei. Ei reih khopa cha eima palôh, hmotaona raihriana lia heta adona( justice) he y sala tahpa he a châ.

Sânona liata ei rei khohpa cha ngâchhihna he a châ. Department hropa cha vaw soh chy sihla, atanoh taihta Pachutuhpa a post liata y phathi leipa, Pachuna hlâta Politics, Awnanopa, Sahdô, Leipalie, raihropa a pahâh viapa ama y thlâh chyhpa he a pei ngaita. Sawhkhâ raihriapa ama rai liata ngâ âchhih leipazy he Râh hmiahaopa ama châ. Atanoh lia cha adona, ngâchhihna nata tiamana he eima raihriana kao nano nanopa, pachuna kyh liata chhao eima pachâ peimawh awpa he eima Râh ta eimâ ngiah ngaita kaw.

Atanoh he liata âchuhaipazy bie ei chata khohpa ei cha Lecturers athaipazy ta pachuna ama chapiepa he pachâ peimawh ula, nama talent hneipa chyu papôhsa ula, cha nama thainazy cha pachuna châ ta nata eima râh châ ta a vaw châ aw. Pachâ peimawh leipa ta nama y khiah nohro angiapachhipa ta achu pathi khoh kaw hra la, achu pathi thai awpa châ khao aw vei. 

Achhâchaina ta ei rei khohpa cha DIET Siaha he eima ry liata pa châ hra vei sala, Eima râh liata a ypa, thaina sona miah pie tuhpa a châpa vâta MADC heta mopakho leipa aw ta, eima tao theina liata cha eima baokhâ lymâ aw tahpa he a châ. Principal, Lecturers, programme liata âhloapazy , Students âchupatlopazy nata âchuhaipazy nama zydua hnohta alyna bie ei cha hlâ ei ' tahpa ta CEM ta a reih.

Pihnô Dorene Solo, Lecturer, DIET Siaha ta Certificate hlâna nata H. Rokhama Award (f/o H. Lalfakzuala, Ist Principal, DIET Siaha) raina daihti hmah ta, C. Lalramzauva ta he Award he adao.  Puhpa N. Abela, EO, MADC nata Puhpa Kt. Heitha, outgoing Student zy ta biereina chyupa ama hnei hra. HC. Ngosua, Ist Semester nata Esthy, 3rd Semester zy ta hlasapa ta programme ama palôh pahawh. Puhpa, MC Rohlupuia, Lecturer, DIET Siaha ta vote of thanks reina a hnei Khai tawhta daihti pachhâsapa a châ.

ISSUED BY:

Information & Publicity Department,

Mara Autonomous District Council,

Siaha.