Ahmiatua ta Mara zawpi zydua eima Beipa Zisu Krista moh ta Christmas nata Kôthiehpa anaohna ei cha hlâ ei.

Kô kha chhôh khihsatôhtuna nata raikhialana nano nanopazy patlô theipa ta kô zy eima vaw pachhâ thei awpa vâta miah vaih tah, miah hrôbieh tuhpa eima Khazohpa moh cha reithaipa ta y mawh sy.

Eima Beipa Zisu Krista khizaw liata chakao awpa ta avaw pina daihti rônah ngaitapa he Krizyhpazy châta cha daihti rônah, peimawhpa nata aly chhih ngaitapa châ ta, keimo Marasaw châta chhochhi cha aly via pachai awpa eima châpa ei pahno tyh; Thâtihpha khaihna vâta eima pahno beih leipa, hmô beih leipa, sapa nata thlahpa byhnâ hluhpi eima topa a châ. Sapa nata Thlahpa liata ryureina eihrâpa eima hneipazy vâna he ta Marasawzy eima vâhnei zie nata Abeipa ta kyh miah a pachâzie he pahno thaipa ta, Abeipa liata eimâ ly ngaita kaw awpa a châ.

Atakô 2022 eima Beipa Zisu Krista pina daihti nata Hâhkô 2023 Kôthieh ly y chhihpa vaw tlô awpa he ta Mararâh chhô liata apahrâpa zydua hnoh ta thaphana, thlalôhna nata byhnâ thiehpa hluhpi vaw tlôkhei mawh sy.

Marasaw, nietluana vâ nata achuna vâta eima râh khôtho lâ a ypa zydua chhao ta, he daihti he aly kawpa ta hmâh chyu awpa ta khokheina cha hlâ ei na ta, pari theipa nata moleina hropazy tawhta asohsipa ta, Khazohpa khozie hawhta nata miah â hnawna hawh tlai ta Christmas nata Kôthiehpa daihti vaw tlô awpa he hmâh chyu achhuah ei si la, ato liata Khazohpa cha Bei chaipa vaw châ lymâ mawh sy.

He Christmas nata Kôthiehpa he ta mo to châta byhnâ hluhpi vaw tlôkhei sa la, eima zydua hnoh ta adyhna nata aryhna vaw tlô mawh sy.

Mararâh zawpi zydua, Christmas nata Kôthiehpa Alypa nata Thaphapa ta hmâ chyu awpa ta khokheina asâh chaihpa ei cha hlâ ei.

“Palôh Ano lâ pahy la, ryu hmohropa byuh khao aw vei.”

Sd/- N. Viakhu

Chairman

Mara Autonomous District Council

Siaha.