PRESS RELEASE

No.32/2020

CEM’s MESSAGE ON 48th MARA AUTONOMOUS DISTRICT COUNCIL DAY

SIAHA, 29 Pachawh, 2020 - Puhpa N. Zakhai, Hon’ble Chief Executive Member(CEM), Mara Autonomous District Council, Siaha ta 48th District Council day eima tlôna noh liata ary liata palâsapa hawh ta Mara zawpizy hnoh ta bietana a hnei:-

Mara Autonomous District Council Day ei 48-na eima vawtlô theipa vâta Mara zawpi zydua MADC Day 2020 anaohna Samaw ei cha hlâ ei.

Atanoh he Marasawzy pi ta he Mara Autonomous District Council châta avaw hriapasatuapazy, eima Chi nata Pho thapasapa nata kyh pachâpa ta keih avaw chakâ lymâ tuhpa zydua my leipa ta khâ a thei pi ta, zana nata palyupalihna eima hlâ.

Mara Autonomous District Council he Târi 29th Pachawh, 1972  pa liana khata hmôpa châ ta, chatanachata atahmâ he 11th Term MDC, MADC ta achhihtha haino a châ.

Chyhsa zydua châta byhnâ châ khai thei hravei sala, MADC he ta Marasawzy châta byhnâ hluhpi atlôkhei lymâ hrapa a châ. MADC kô 48 chhôh avaw sie hapa liana heta eima râh châta hmahsiena tha ta tlôkhei ta; Marasaw eima vâhneizie nata Abeipa ta kyh maniah a pachâzie he pahno thaipa ta, eimâ ly ngaita awpa a châ.

Ahy hriapasana nata novâhna tlyma, eima siana nata thaina nata sona vâta châ leipa ta, Abeipa eima Khazohpa saiheina nata kyhpachâna vâ deita Chi nata Pho ta rei tlâh châ leipa Marasawzy cha Rev. RA. Lorrain nata a chhôhkhazy hmâpa ta Thâtihpha ta maniah kawpa khaihsa ta, kao hluhpi liata byhnâ tha ta dao lymâ pi ta, he MADC chhao he ahmô theipa eima châ tah lei thei va na. Arôhna ngaita.

Mararâh he eima râh châ ta, achhôh liata a y pa zydua ; Mara reih, aleilô nata abie hneina zydua chhao keimo eih sai a châ. Kyhpachâna chôta pabohsa ta cheih-chalo lymâ awpa chhao eima tao awpa hialia a châ hra. Eima râh khôtho lâta Marasaw a y pa zydua chhao ta cha cha pahno thaipa ta eima râh tha pasana ama hnei via lymâ hr’awpa nata Mara reih chhao ama thai lyhlia awpa peimawh ta, Marasawzy cha khataih lia rai y hra ei sih la, apôhkha ngaitapa ta hmahsiena phapa liata eima laiseih lymâ awpa a châ.

Mararâh he Abeipa ta eima chhâh maniah châ lymâ aw ta; Pho hropazy ta maniah disao awpa nata parao-pakei awpa rai pasaih aw ma pi.

Mararâh liana heta aryhna nata hmahsiena khochhihpa charei lymâ mawh sy.

Issued by:-

Information & Publicity Department

Mara Autonomous District Council

Siaha.