PRESS RELEASE

NO.46/2023

SIAHA, 27 Hmypi, 2023, Hriatuanoh -  Atanoh khata Puhpa M. Laikaw, Chief Executive Member(CEM), Mara Autonomous District Council (MADC) ta, Mizoram Governor Puhpa Hari Babu Kambhampati cha a pahrâna O Raj Bhavan Aizawl liata chareipa ta Apakyhna daihti pha kawpa ama hnei.

Mizoram Governor ta Puhpa M. Laikaw, Mara Autonomous District Council liata CEM châpa ta sawhkhâna ama padua theipa chôchâh liata alykheina nata khokheina a hlâ.

Puhpa M. Laikaw, CEM ta Mara Autonomous District Council ta apeimawhpazy tlôkheipa ta, atanoh taihta Salary Bill, Mizoram sawhkhâ tah apatâh thlâh hapazy tlôkhei ta, zâkhanoh liata MTP General Headquarters, Siaha zy ta Governor hnohta hmo byuhpa ama tlôkheipazy cha, achatlie viapa ta hmahla khei awpa ta Governor hnoh ta â haw.

He hleikhô ta, MADC ta project apangiapazy chhao Governor hnoh ta hmalakhei awpa ta â haw hra.

Mizoram Governor he apahy kaw ta, kao totie liata MADC hmahsie nawpa ta hmah ama lapa zydua liata a baokhâ awpazie a rei hleikhô ta, Hnathial nata Lunglei District zy atly khai tawhta thlai ta Siaha District akaw tly heih awpa zie a reih.

Atanoh pyly khata Puhpa M. Laikaw, CEM, MADC ta Puhpa Lalthathanga (Scientist E) Technical Director, NIC, Mizoram chhao charei ta, Mara Autonomous District Council  ry liata Information and Technology (IT) hmahsie nawpa chôchâh zy adaohpa ta, IT chôchâh liata MADC ta apeimawh chaipazy a tlôkhei.

Puhpa Lalthathanga ta CEM hmo tlôkheipazy papeimawhsapa ta, Internet facilities nata NIC data asaipa ta MADC a pahmâsa awpa hleikhô ta, IT Wing châta hmo byuhpa zydua baokhâ lymâ awpa â chhuazie a reih.

Puhpa M. Laikaw, CEM zachhihpa he Satlia Delson Nôtlia, BJP National Secretary, Minority Affairs ta a chakaochahlâ.

ISSUED BY:

Information & Publicity Department

Mara Autonomous District Council

Siaha.