PRESS RELEASE

NO.59/2021

SIAHA, 6 Di, 2021, Hriatuanoh – Atanoh dawh 12:00 Noon kha ta Chin Baptist Church (CBC), USA tawhta vyuhtuapazy ta MADC nôpawpazy ahmôpa ta apakyhna nata alynabie reina daihti ama hmâh.

Daihti thaona liata Meeting Chairman Puhpa N. Zakhai, Hon’ble CEM ta CBC, USA vyuhtuapazy a vaw lypa ta ama chô liata alynabie reih ta, hmiapahnosana nata amâ vyna chhâpazy reih awpa ta CBC, USA vyuhtuapazy daihti a pie ei.

CBC, USA vyutuapazy tawhta Dr. Thlaawr Buihrin, Women Director, CBC, USA, Rev. Sui Hliang Chorei, Women Director, CBC, USA nata Dr. Tial Ling, MP zy ta biereina hnei ei ta, Puhpa N. Zakhai, Hon’ble CEM nata a hrialâhpazy ta he hawhta meeting daihti phapa ama pie vâta alynabie reih ei ta, MADC nôpawpazy nata Mararâh zawpi ta Refugee ama vaw deichhyna kyh zydua liata alynabie rei awpa he amâ bâh hmeiseihpa ta pahno ei ta, phone calls nata châropa ngâlâh dei â daih tah leipa ei ta, ama pôhpa cheingei ta Chin State zawpi vyuhpa ta alynabie rei awpa ama khoh vâta LADC nata MADC he avaw tlypa a châ tahpa ama reih.

Mararâh zawpi ta Refugee zy ama deichhyna zydua liata palôh hmeisehpa ta alynabie reih ei ta, hmialâ daihti lia chhao ta deichhy pazao lymâ awpa ta ahawna ama tao hra.

Puhpa N. Zakhai, Hon’ble CEM, MADC ta CBC, USA vyuhtuapazy hnoh ta thlalôhna bie reih ta, “India râh Mizoram State liata MADC zy, LADC zy vaw y pi ta, eima unawh Chin State (Myanmar) liata eima chyhsa, military coup vâta rairuna a tyh ngâhaipazy, palôh hmeiseihpa ta eima chatao khei” tahpa reih ta, “nâmo nôpawpa, su nano nanopa liata ypazy, nama chyhsa heihpazy vâta nama hriapasana nata nama hraihriazy pahno pi ta, eima cha za ngai ta, keimo chhao eima theina rakha liata bao lymâ awpa he eima kho kawpa a châ” tahpa ta a reih.

“Keimo cha sawhkhâ eima châna hawhta taotheipa hnei tu lei pi ta, eimâ bôchhâpa MTP, MSO, Awnanopazy nata Mararâh zawpi zy lâta eima theina rakha ta baona tao chyu awpa ta ahawnazy tao pi ta, atanoh taihta, tha nata zâhzy hleikhô ta hneina sôhzy nata hmobaoh lâ zy, Mararâh zawpi ta apasai kawpa ta eima theina hawhta eima bao lymâpa a châ.”

“He hawhta Mizoram liata MADC nata LADC zy miah vaw tly ei chi ta, vyutuapa hyutuhpazy nata ahmôpakhyna vaw hnei thei pi ta, eimâ ly ngaita; unawh eima châna hawhta eima theina hawhta eimâ bao lymâ awpa a châ.”

“He hawhta, eima hmotao chynawh kawpazy pasô thaipa ta alynabie nama reipa he Khazoh khozie chhao a châ; hmialâ daihti a vaw y awpa liata chhao, atanoh liata nama chakaona he ta byhnâ a vaw tlôkhei cheingei nahta ei pangiasa. MADC miah nama vaw tly vâta keima nata ei hrialâhpa zy pi ta, Mararâh zawpi vyuhpa ta alynabie cha reih pi ta,  hmialâ nama sie lymâ nawpa liata khokheina ei cha hlâ ei.”

MADC nôpawpazy amâ pakyh khai tawhta MTP General Headquarters liata nôpawpazy apakyhna nata alynabie reina ama hnei heih hra.

CBC, USA vyuhtuapa nôpawpazy he chanô pa 1 nata chapaw pa 4 châ ei ta, Puhpa C. Thahe, Secretary, Chin Refugee Committee, Siaha ta a zi laih hra ei.

ISSUED BY:

Information & Publicity Department

Mara Autonomous District Council

Siaha.