PRESS RELEASE

NO.64/2023

SIAHA, 24 Pamih, 2023, Chutynoh - Atamy dawh 11:00 Am khata Puhpa HC. Lalawmpuia, Controller of Examination, Board of School Education (BSE), MADC office chamber liata MADC Model Students’ Scholarship Examination nata Result phuahna kyh liata meeting hneipa a châ.

Meeting he Chairman Puhpa HC. Beikhai, Secretary, BSE ta chhihtha ta, Pihnô F. Ngobu, Superintendent, BSE ta pavaosana thlahchhâna a hnei. Puhpa HC. Lalawmpuia, Controller of Examination, BSE ta Model Students’ Scholarship chôchâh liata BSE hmahlana zy, târi 24 Hmypi, 2023 liata Model Students’ Scholarship exam siekheina nata târi 23 Pamih, 2023 liata result phuahpa thâtih report a pie. 

He meeting liata hruapa MSO Gen. HQ tawhta Puhpa T. JB. Rona, President nata Puhpa John Tennyson Tlapyu, Fin. Secretary zy ahlao ei ta, MADC department hropa tawhta Puhpa Beirokhu Beita, I & PO chhao â hlao. DDK Siaha stringer tawhta Laihsa Evelyn Chozah ahlao ta, Maraland Primary Teachers Association tawhta Puhpa S. Chholai, Headmaster, ECM Vaih Primary School chhao â hlao thei hra.

Atahmâtahpa he ei 3-na ama siekheina châ ta, hmialâ ei 2 vaw siekhei hapa liata cha MDC bia capital liata exam pa châ ta, he he studentzy rairuna amâ tyhpa ta pahnopa a châ vâta atahmâ lia cha ama khih chyu liata exam awpa ta ryhraopa châ ta, atahmâ liata student 2173 zy ta exam he ama hmiachhypa a châ.

Atakô Model Students’ Scholarship Examination liata ahlao theipazy he hawhta duahmo a châ:-

Class IV = 647

Class V = 568

Class VI = 492

Class VII = 466

Total = 2,173

He nahzyhry liata Class-IV liata MDC bia 25 tawhta studentzy Scholarship piepa châ aw ei ta, Class-V, VI & VII zy tawhta MDC bia 24 liata piepa ama châ hra aw. (Siaha Vaihpi bia deikua ama bia liata Middle School a y lei vâta Scholarship piepa châ vei). 

MDC bia to liata mark a hmô hluh chaipa pakha chyu hnoh ta Scholarship he pie awpa a châ.

MADC Model Students’ Scholarship adao awpazy he Thlakha liata Rs.500/- hihsâpa ta kô kha châta Rs.6,000/- piepa ama châ aw.

He Model Students’ Schoolarship Examination ta â chhuah chaipa cha Studentzy palôh liata competition pathaihpa y sa la, hmialâ achuna liata ama kaw sie lymâ nawpa liata phahnai awpa ta hnabeiseihpa ta taopa a châ. 

He programme liata Puhpa T. JB. Rôna, President, MSO Gen. HQ ta biereina chyupa hnei ta, MADC BSE hmotaopa reithai ta, MSO Gen. HQ he achuhaipazy hmahsie nawpa a châ khiah BSE baokhâ lymâ awpa ta khatino rai amâ mâ tahpa reih ta, BSE hmialâ a sie lymâ nawpa liata khokheina a hlâ.

MTPA HQ Siaha vyuhpa ta ama Secretary Puhpa S. Chholai, Headmaster, ECM Vaih Primary School ta biereina hnei ta, Puhpa JB. Khaisia, Proof Reader, BSE chhao biereina chyupa a hnei hra. Puhpa Beirôkhu Beitâ, I & PO, MADC tawhta khokheina nata hmahla pazi nawpazy liata ahawnazy taopa nahthliepa a châ hra.

Model Students’ Scholarship Examination Result, 2022-2023 cha he Press Release raohpa ta a nothlahpa (photocopy) nata PDF ta so pâpa a châ.

He meeting liata Model Students’ Scholarship piena kyh liata kho akhi leinzy reipa châ ta, hmialâ daihti liata zôpha viapa ta siekheipa a châ thei nawpa kyh zy reipâpa a châ.

ISSUED BY:-

Information & Publicity Department

Mara Autonomous District Council

Siaha.