PRESS RELEASE

NO.38/2026

SIAHA, târi 29 Pachawh, 2025 (Pakhynoh) - Atanoh dawh 10 : 00 AM liana khata Mara Autonomous District Council (MADC) kô 54 a tlohna noh pachhaipa ta MADC Golden Jubilee Hall, Council Vaih liata MADC liata MDCs, Officers nata Stafffs zy ta Abeipa hnohta Alynabie Reina, Molei Reihpha Cheina nata Ahlâ Pathiehna daihti hmâpa châta, he khai tawhna heta  Pathaihna Tlâhrai hriana daihti hmâpa a châ.

Abeipa hnohta alynabie reina, molei reihpha cheina nata ahlâ pathiehna daihti chyupa he Puhpa K. Vanlalliana, Executive Secretary, MADC ta a chhihtha. Puhpa M Laikaw, Hon'ble CEM, MADC ta bietana chyupa reina a hnei.   

CEM chata " Executive ryhraona hawhta adaihti ta liata Abeipa hnohta alynabie reina, Molei reihpha cheina, ahlâ pathiehna nata Pathaihna rai hria awpa ta vaw puapakhypazy nama hnohta alynabie ei rei. Atamy he ei hruana pachâ peimawhpa ta Puhpa PP Thawla, Ex.CEM, Ex. Minister ta he daihti miah âvaw hlao theipa he ei ly hmeiseih". 

"Kô 1953 lia khata PL Regional liata Mara, Lai nata Chakma nah cha Awhby sâkha liata khô khohpa hawhta vaw châ pita, Kô 1972 liana deikua cha Missionary nah hmâpa ta Khazohpa ta atlua papuapa Râh he Khazohpa ta Nôpaw hmiatuapa nah zawhzi ta India Sawhkhâ ta Ryureina eih hrâhpa District Council miah a vaw pie haw. PL Region tawhta District Council eih hrâhpa eima hnei theina awpa ta Thokha Nôpaw hmiatua penawhzy kha Mawrâh buana hryta  ama luh bawpa ta ama O nata Lyuzy siesaipa ta nah ta, thokha PL Region liata boycott pata ama raizy ama vaw bâh sai. Atamy he Nôpaw hmiatua penawh hriapasana kha a thei pita, Thyutlia sawzy chhaota he eima Nôpaw hmiatua penawh hriapasana he my leipa ta khâ eimâ thei ngâthlâh ha awpa a châ".

"Atanoh cha, Mawrâh Khihpi liata zy dei chhao châ leipa ta India Râh Khihpi nano nanopazy liata, achuna nata niedo tluana liata keih eima vaw chakâ theina chhâpa he District Council eih hrâhpa eima hnei theina awpa ta Nôpaw hmiatua penawh hriapasana vâta na a châ e tahpa he a thiehpa ta eimâ thei heih awpa a pha kawpa ta ei pahno. He dei châ leipa ta, chyhsa thy sari hlei liata keimô chyhsa sâh no hlei khazohpa nata eima Nôpaw hmiatua penawh hriapasana vâta District Council liata eima hria theipa chhao he eimâ ly kaw awpa a châ. District Council hropazy Sawhkhâna sie kheina liata rairuna amâ tyh no chhaota 12th Term MADC he apha kawpa ta sie lymâ ta, he chhao he Khazohpa vâ deita na a châ tahpa pahnopa ta, eima ly kaw awpa a châ. Atanoh lohpapuana tlâhrai eima hriana hawhna heta atanoh tawhta cha moh hropazy châta byhnâ châpa ta loh papua awpa ta; office daihti a vao pado awpazy, hyutuhpa nah nata uhthei viapazy reingiahna nata zana piena chôchâh liata zy, tiamana nata ngâchhihna hro liata ta zy, apiepasana hro liata zy, eimâ Râh châta byhnâ châ hra thei awpa ta atanoh he eimâ hlâ pathiehna noh vaw châ mawh sy" tahpa ta Puhpa M Laikaw, CEM ta MADC liata ahriapazy hnohta pasyuna bie a rei.

Thlahchhâ chhihthana châta CEM ta Abeipa bie, "_ei mo  a phaopa chysazy chata a panawsapa ta thlahchhâpata eina tlua nata, ama yzie moleipazy cha ama heisai khiatala ava tawta vaw nathli awh na ta, ama moleizy angiathai awh na ta, ama ra cha ei patla hei awh", 2 Thâtihzy Rona 7 : 14 _ reina a hnei. Thlahchhâna biepi miah thô:- (1) Alynabie reina: Kô 1972 liata a eih hrahpa ta Khazohpa ta  District Council miah piepa vâta. Kô 54 chhô; Ist Term tawhta 12th Term MADC miah chhihthapa ta Chhihthatuh phakawpzy miah a piepa vâta. Khazohpa nata Râh Nôpawzy khokheina vâta MADC liata  hria theipa eima châpa vâta Abeipa hnohta alynabie reina.  (2) Molei ngiahthai ahawna; tao awpa eima tao leipazy, tao lei awpa eima taopazy. Eima raihria chyu liata diathli diathlâ kawpa ta nah ta karâ-y kawpa ta eima vaw taopazy. Khohleikho kawpa ta eima vaw tao tlamawpazy. Ahy hmahta siapkipa eima châ leipa vâta Abeipa hnohta ngiahthai ahawna nata reihpha cheina. (3) Ahlâ pathiehna; Ryureinazy, biehneinazy he Abeipa eih a châpa hawhta Abeipa Khozie ta ahriatuhpazy eima châ chyu theina awpa ta Abeipa hnohta apavaosa tah, ahlâ pathiehna. He biepipazy hmâpa heta Abeipa hnohta alynabie reina, molei reihpha cheina nata ahlâ pathiehna Thlahchhâ paraona hneipa a châ. 

Golden Jubilee Hall, MADC liata daihti chyupa hmâkhai tawhta Siaha Khihpi Vaih nano nanopazy liata Khiliah Pathaina Tlâhrai hriana hneipa a châ. 

54th District Council Day pachhaipa ta, Puhpa Beirokhu Beita, Circle administrative officer, MADC chhihthana ry liata Chakhei VCs (3) nahzy ta Chakhei Khichhôh Pathaina Tlâhrai ama hria hra.

Atanoh he MADC liata ahriatuhpazy dei châ leipa ta Siaha Vaih Thokha liata VCs nahzy chhaota Siaha Khihpi Khiliah Pathaina Tlâhrai he ama hria hra.

ISSUED BY:

Information & Publicity Department,

Mara Autonomous District Council,

Siaha.