RESS RELEASE

NO.47/2025

SIAHA, 29 Pachawh, 2025, Hriaheinoh - Atanoh Mara Autonomous District Council (MADC) kô 53 a tlohna noh pachhaipa ta my dawh 7:00 AM - 8:30 AM chhôh kha ta MADC Golden Jubilee Hall, Council Vaih liata MADC ta alyna programme ahmâpa a châ.

Programme he Puhpa K. Vanlalliana, Executive Secretary, MADC ta chhihtha ta, Rev. T. Salaw, Sr. Executive Secretary, ECM Assembly ta Ephesi 5:15-18 reina nata reipakawhna hneipa ta programme Abeipa lâ pavaosana hnei ta, Laihsa Dinai C. Lalruatdiki, Gospel Artiste ta Khazohpa reithaina hla sa ta, Puhpa S. Pailei, Ex-CEM, MADC nata Puhpa S. Lalremthanga, Dy. CEM, MADC zy ta biereina daihti ama hmâh.

Puhpa S. Pailei, Ex-CEM, MADC chata biereina chyupa daihti a hmâpa liata, eima Missionary Revd. RA. Lorrain pasopakâna ta târi 4 January 1945 liata Mara Bei 23 zy ta Saikao lia tlôpakipa ta Marapazy ta Ryureina eihrâhpa hnei awpa ta amâ hmaohpakhypa kyh nata nôpaw hmiatuapazy hriapasana thâtihzy reina hnei ta, Marapasawzy ta Khazohpa pahno awpa a byuhzie reih ta, Khazohpa pahnona chô ta râh ryureina siekhei awpa a peimawhzie a reih.

Aizawl tawhta Awh, Silchar tawhta Chohlô & Tomato zy eima chalei ngâthlâhpazy he noza achhih ta, Marasaw chyhsa chyhta châ pi ta, hriapasa via ta ativy awpa a peimawh tahpa reih ta, Ti nata Râh hmahsie via nawpa kyh liata sawhkhâ angiapâ thlâh leipa ta, eima zydua ta hmahla chyu awpa ta Marasaw zydua pasyu ta, thathina vâta sôh thlai thlai hmô nawpa ta Drugs zy zua laihpa ta Marasaw thata eima raokeipa kyh zy reih ta, he hawhpa hmo bâsai pa ta nietluana dopa lâthlôh a chhih awpa kyh a reih hleikhô ta Hriapasana deileipa ta ti nata râh hmahsiena y hmeiseih thei vei tahpa pahnosa chô ta tiama kawpa ta chhôhto ta hriapasa chyu awpa ta Marasaw zydua pasyuna a hnei.

Puhpa S. Lalremthanga, Dy. CEM, MADC chata biereina chyupa daihti a hmâpa liata, “Rairuna y leina chô ta MADC Day eima tlô thei vâta Abeipa lâ alynabie reih ta, Zawpi avypa zydua hnoh ta alynabie a reih. District Council eima hneina dâh zy, District Council eima hmô thei nawpa ato apakytuhpa nata hriapasatuhpa leaders hleikhô ta zawpizy reiraohna vâta District Council eima hmô theipazy, District Council vâta Marasawzy nietluana sawhkhâ rai hria pi ta, aly â chhihzie reih ta, hriatuhpazy ta eima rai liata Khazohpa ta pahnona chô ta hria awpa a peimawh” tahpa reih ta, râh zawpi châta eima theina liata byhnâ châ lymâ awpa MADC ry liata hriatuhpazy bietana nata pasyuna bie a reih.

Dy. CEM chata, “District Council duasu pahno khai pi ta, eima duahmo mopa ta raihria nawpa sôh a chyh kaw; chavâta biehneina lai viapa hmô awpa ta tei awpa a peimawh. Eima râh chhithatuhpa hmiatuapazy ta, thyutliapa zy châta atahmâ ta District Council he maniah hmôpa ha ei ta, keimo thyutliapazy chhao heta chhâ a vaw y lymâ awpa eima Mara chi nata pho châta apahniehna tlâh a châ awpa District Council biehneina lai viapa hmô thei awpata thapi phia ta, tei awpa he cima ngiatlâh liata âchahâ. He râh hlei khôpa he Khizaw liata eima râh tah awpa hneileipa pi ta, chavâta, eima râh hnei chhôhpa he kyh totie liata hmahsie awpa ta thapi phia chyu awpa he eima maophaohna a châ. Mara chi nata pho kyhpachâna chôta, loraoh kawpata ti nata râh châta eima tei lymâ khiata cha Marâ chi nata pho ta maniah a taotuhpa eima Khazohpa heta maniah a heisai leipa aw ta, biehneina lai viapa cha maniah a pie cheingei aw” tahpa reipa ta zawpi lâ MADC Day anaohna nata alynabie reina a hnei.

Khazohpa ta MADC miah a pie vâta alynabie reina, MADC â dua tawhta atanoh taihta a chhihthana vâta, MADC hmialâ a sie laih lymâ nawpa châta pavaosana nata mopakha ahlâ pathiehna hneipa ta zawpi ta thlahchhâna hneipa châ ta, KHB No. 54 “Byhnâ reih la miakha miakha ta” tahpa zawpi hlasana hnei khai tawhta Bei Zisu thlahchhâ pachupa zawpi ta reiparaohpa ta programme he pachhâsapa a châ.

ISSUED BY:

Information & Publicity Department

Mara Autonomous District Council

Siaha.